ابن الوزير صاير فرخ الزير

سابقا من كنا نتفرج على القنوات التلفزيونية والمسلسلات العربية و الاجنبية ،  كنا نستعجب من الامور اللي داتصير بالبلدان الاخرى مثل الفوضى و الفلتان الامني و الاستهتار و الاستخفاف و الاستهانة بعقول عامة الشعب و حتى المثقفين و الواعين. دائما كان يدور في بالي جبروت و عنترية و استهتار الشخصيات المصرية اللي كانت اتمثل ادوار المعلمين و كيف كانوا يسيطرون على الحارة و يظلمون الناس و ياخذون من عندهم فلوس كخاوات و عنتريات.

دار الزمان و راحت ايام و القصص اللي كنا نتفرج عليها و نتابعها صارت مسلسلاتنتا اليومية ، بحيث اصبح اصغر و اتفه مسؤول او وزير هو الامر و الناهي في بلدي. يعني اللي جاي دايصير مو استهتار و استخفاف بعقول الاخرين مثل هاي الحاديثة مالت الطائرة اللي كان سببها ابن وزير النقل. يعني استهتار ابن الوزير اللي حاسب نفسه ابن زير السالم اللي حارب من اجل ثأر اخوه اكثر من 40 سنة متواصلة بحيث كان يردد دائما لا تسامح و لاتصافح. طيب يا سيدي الوزير اللي انت جاي اتمثل الدولة في جانب مهم من اقتصاده اللي هو النقل بكل انواعه البري و الجوي و البحري و كذلك انت جاي اتمثل الطيران المدني العراقي ، ابشرفك ما استحيت من تطلع بالتلفزيون و تكول اني جاي احاسب ابني اذا هو امقصر طيب التربية الصحيحة النابعة من الاسرة الصالحة وين راحت!!!!!

طبعا هذا جزء من استهتارات و عنتزيات مرافق الدولة عندنا يعني ابشرفكم موازنة دولة بأكملها تتوقف على تصويت مجموعة من عفطية المجتمع ، طيب اذا انتم هلكد خايفين على الموازنة اتبرعو اشوية من رواتبكم للشعب المكرود المسكين اللي خدع نفسه و راح يخدع نفسه مرة اخرى في المشاركة بالانتخابات النيابية. طيب العالم شنو ذنبها بان اكو خلافات بين الاقليم و المركز او بين طائفتين او بين حزبين او كتلتين عسى ناركم تاكل حطبكم و لكم قرروا عاد لان الناس جاي تدمر و العالم جاي داتكدي بالشوارع.

المشكلة او اني اسميه الطامة الكبرى بأن اي شي تحجي تطلع انت الغلطان و الحق عليك و اللي جاي دايسووه هو كلها لصالح الشعب و الخدمة العامة. بس اني ارجع و اكول من رأى منكم منكرا فليغيره بيده و ان لم يستطع فبلسانه فان لم يستطع فبقلبه وذلك اضعف الايمان. احنا حاليا نكتب و ننشر و نناشد السادة المسؤولين و ارئاسات و الوزراء بأن لازم يعيدون حساباتهم ، لان صدكوني يا جماعة الخير ترى زمن الهرج و المرج ولى و راح يجي يوم الحساب امام الواحد القهار يوم لاينفع مالا و لا بنون الا من اتى الله بقلب سليم و ذاك الوكت راح اتعضون اصابعكم لما فعلتموه بالدنيا و بها الشعب المسكين المتألم  المهدود اللي دايتحمل من الاهات و الويلات و القتل و النهب و الذبح خلال هالعشر السنوات و العقود السابقة ما لم يتحمله جبل او اي حجر.

بالنهاية اريد اشكر كل من يقرأ هذا البوست البسيط و المكتوب بالغة شعب بلدي لان بصراحة اني حسيت حالي مو مال اتفلسف بالفصحى و ازوق الكلمات و اخلي العالم تمدح ابكتاباتي ، بالعكس اليوم حبيت هاي الفكرة اكثر و اكثر وهي الكتابة بلهجتي.

يا ابن الوزير لا تصيرلنا فرخ الزير لان اذا تتذكر بالمسلسل ذلوه للزير و خلوه يتخبل و يخبط يميمن باليسار. و لاتنسى يا ابن الوزير بأن بن فرناس كان عراقي يعني هو الواضع لقانون الطيران البشرية و لاتنسى بأن الخطوط العراقية و المسافرين العراقيين في السبعينات و الثمانيانت كانوا من ارقى مافي الكون و لاتنسى يا ابن الوزير بان العراقيين وين ما صارو لازم يرفعون راس بلدهم مو ينكسون عكولهم.

Advertisements
بواسطة Qais Qazaz

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s